Sat, 15 Aug 2020

Cebuano News: PCC padayon sa pagpataas sa kalidad sa bisaya nga kabaw

Philippine Information Agency
31 Jul 2020, 16:38 GMT+10

TAGBILARAN CITY, Bohol, July 31 (PIA) -- Andam ug tagana ang Philippine Carabao Center (PCC) sa pagdala sa ilang serbisyo ngadto sa ni bisan kinsa nga mag-uuma nga nag-atiman sa kabaw kinsa buot nga makaliwat kini sa mas maayo nga klase.

Kini maoy gipasalig ni Dr. Gondolino Bajenting, ang Officer in Charge ug center Director sa PCC sa Ubay Stock Farm sa Lomangog Ubay Bohol, kinsa usab misaysa sa Kapihan sa PIA sa ilang programa.

KAUGMAON SA MAG-UUMA. Gilantaw sa PCC ang kaugmaon sa mga mag-uuma ug ila nga gipaneguro nga makatabang sa pagpangitag dugang kita pinaagi sa pagpataas sa matang lokal nga mga kabaw aron mas modaghan ang gatas niini nga mahimo usab ikabaligya (PIA Bohol)

Kabahin sa 13 ka mga PCC centers nga nagkatag sa tibuok nasud, ang PCC Ubay Stock Farm (USF) karon maoy nangabaga sa hagit ni kanhi Agriculture Secretary Emmanuel Pinol nga himoon ang Bohol nga Milk Capital sa Central Visayas kon dili man ugaling sa tibuok nasud.

Ang pagkab-ot sa Bohol sa nasampit nga damgo nga hugot usab nga gihangop ni Gobernador Arthur Yap, kinsa misalig nga ang pagpanggatas daku og ikadugang sa kita sa usa ka mag-uuma.

Kanhi kalihim sa Agrikultura, si Gob Yap mibutyag nga daghan nga kaayohan ang mapaabut sa pag-ugmad sa local nga mga kabaw, lakip na niini ang pagpabag-o sa ilang kadagkoon, ang pagdaghan sa igatas niini, ang pagkaanindot nga klase sa karne, pagpataas sa nutrisyon sa kabataan, ug ang pagpasugod og dugang kapanarbaho-an alang sa mga magtrabaho sa value chain sa pagpamuhi og kabaw alang sa gatas ug karne.

Mas naaghat sa suporta sa gobernador, gibutyag ni Dr. Bajenting nga duha ka programa ang ilang gitanyag karon sa mga Bol-anon nga nagbuhi og mga kabaw, ilabi na kadtong gatasan.

Matud sa beterinaryo nga hepe sa PCC Bohol, aduna silay programa sa artificial insemination, ang artipisyal nga pagpabuntis sa babaye nga kabaw pinaagi sa injection, ug gamit ang gihiusa nga mga maayong kinaiya sa mga kabaw nga dumagkoon, ug maayo nga klase.

May mga farm technicians nga gibansay sa PCC alang niining maong buhat, kinsa usab maoy mahimong tawagon sa mga tag-iya sa kabaw kang kinsa nga mga gatasan, naa na sa iyang fertile cycle.

Kinatibuk-an nga 18 ngadto sa 21 oras ra ang pagpanguwag sa kabaw, ug kon dili kini makastahan o madapatan sa artificial insemination, magpaabut na usab sa 18-21 ka adlaw aron mobalik ang cycle, pasabut sa taga PCC.

Ang artificial insemination maoy solusyon sa PCC sa mga lugar nga hilit ug lisud nga himoon ang pisikal nga pagdala sa maayong klase nga toro aron maoy mohabal, dugang pasabut ni Dr. Bajenting.

Gani, mahimo, matud pa ni Dr. Bajenting nga mahimo nga sundon ang estrus synchronization protocol aron himoon nga dungan ang pagpanguwag sa mga baye nga kabaw, aron usab sayun ra alang sa mga technicians ang pagsubay sa mga nagsilingan nga mga kabaw.

Sa laing bahin, ang PCC nagtanyag usab og programa alang sa Bull Loan Program, diin mahimong makapahuwam ang PCC sa mga toro nga kabaw ngadto sa indibidwal.

Hinuon, aron dili alkanse sa byahe, ang manghuwam sa toro nga kabaw sa PCC kinahanglang may mga silingan usab nga mga 50 ka mga kabaw aron segurado nga may makastahan gayud.

Kinahanglan usab nga may natanum nga forage grass nga napier (kumpay) nga labing menos 1000 sguare meters aron may kasaligan nga masabsab ang toro.

Ang nakamaayo sa programa, matud ni Dr. Bajenting kay kon ang hinuwaman nga toro, makapaanak na og 50 ka nati, mahimo na nga dili iuli ang toro sa PCC ug ma-iya na sa nanghuwam.

Alang sa mga dugang kasayuran sa ilang mga programa, tanda sa PCC sa Ubay Stock Farm, o text o tawag ni Dr Glen Bajenting sa 09451193998. (rahc/PIA-7/Bohol)

More Morocco News

Access More

Sign up for Morocco News

a daily newsletter full of things to discuss over drinks.and the great thing is that it's on the house!